مصطلحات الأسعار
في الدروس اللي فاتت، تعرفنا على شنية هو الفوركس، كيفاش نربح منو، شنية هي أزواج العملات، وكيفاش يتحرك السوق.
أما قبل ما ندخلوا في التداول الحقيقي، لازم نتعلموا اللغة اللي يستعملوها المتداولين.
خاطر كي تفتح أي منصة تداول، ولا تشوف فيديو، ولا تقرأ تحليل، باش تلقى برشا مصطلحات.
إذا ما تعرفهمش، باش تحس روحك ضايع.
أما كي تفهمهم، كل شيء يولي أسهل.
أول مصطلح باش تلقاه هو Pip.
الـ Pip هي أصغر حركة ينجم يعملها السعر.
باش نخصصولها درس كامل، خاطر هي أساس حساب الأرباح والخسائر.
بعدها فما Lot.
الـ Lot هو حجم الصفقة اللي باش تدخل بيها.
يعني قداش باش تشري ولا تبيع من العملة.
بعدها فما Pip Value.
وهذا يورّيك قداش تساوي كل حركة صغيرة في السعر بالنسبة لصفقتك.
يعني موش كل Pip عندها نفس القيمة، القيمة تختلف حسب حجم الصفقة اللي اخترتها.
بعدها نلقاو Leverage أو الرافعة المالية.
وهذي من أكثر المصطلحات اللي يسمعوا بيها المبتدئين.
الرافعة المالية تنجم تكبر حجم الصفقة متاعك باستعمال رأس مال صغير.
أما في نفس الوقت، تنجم تكبر الأرباح والخسائر.
لهذا لازم نفهموها مليح قبل ما نستعملوها.
وزادة باش نتعلموا مفهوم اسمو Short Selling.
برشا ناس يعتقدوا اللي تربح كان كي الأسعار تطلع.
أما في الفوركس، تنجم حتى تربح كي السوق يهبط، إذا تعرف كيفاش تستغل الحركة هذي.
في الدروس الجاية، باش نفسروا كل مصطلح وحدو، بأمثلة بسيطة وتطبيقات عملية، باش تولي قادر تفهم أي منصة تداول وأي تحليل تشوفو.
أهم حاجة، ما تحاولش تحفظ المصطلحات عن ظهر قلب.
حاول تفهم معناها، لأنك باش تستعملها كل نهار كي تبدأ تتداول.
ويلا بينا نبدأوا بأول وأهم مصطلح في الفوركس...
شنوة هو الـ Pip؟
