كيفاش بدات الفلوس؟
قبل ما نحكيو على الفوركس ولا العملات اللي نتداولو بيها اليوم، لازم نفهمو كيفاش بدات الفلوس من الأصل.
في قديم الزمان، الناس ما كانوش يستعملو فلوس كيما توة. كانوا يعتمدوا على المقايضة، يعني كل واحد يبدّل السلعة متاعو بسلعة يحتاجها.
مثال، فلاح عندو قمح ويحب لحم، يمشي لشخص عندو غنم ويبدل معاه. أما الطريقة هاذي كان فيها برشا مشاكل.
مثلاً، إذا أنا عندي قمح ونحب حليب، وصاحب الحليب ما يحبش القمح، وقتها ما تنجمش تصير عملية التبادل. وزيد السلع ما كانتش ديما تتقسم بسهولة، وما تنجمش تحتفظ بقيمتها مدة طويلة.
مع الوقت، الناس بدات تقلّب على حاجة تكون مقبولة عند الجميع. استعملوا برشا حاجات كيما الملح، الصدف، وحتى بعض المعادن.
أما في الأخير، الذهب هو اللي فرض روحو. علاش؟
- نادر وما تلقاهش بسهولة.
- ما يصدّاش وما يفسدش مع الوقت.
- ينجم يتقسم إلى أجزاء صغيرة.
- والناس الكل كانت تعتبره عندو قيمة.
ولهذا الذهب ولى وسيلة للتبادل وحفظ القيمة، ومنه بدات تتطوّر فكرة الفلوس اللي نعرفوها اليوم.
في الدرس الجاي، باش نشوفو كيفاش انتقل العالم من استعمال الذهب إلى الفلوس الورقية، وعلاش صار التغيير هذا.
